Рөстәм Миңнеханов "Китап" Һәм "Тартип" татар радиостанцияләрендә булды

Бүген, Радио көнендә, Татарстан Республикасы Президенты Рөстәм Миңнеханов «Татмедиа» Республика матбугат һәм массакүләм коммуникацияләр агентлыгында булды. Визит барышында Президентка «Татмедиа» АҖнең кайбер проектларын тәкъдир иттеләр.

Шундый проектларның берсе - «Миллиард.Татар» сайты проекты, аны быел гыйнвар аенда эшләтеп җибәрделәр. Проект татарлар тормышы энциклопедиясе формасында эшли. Сайтта татар тарихы, күренекле татар эшлеклеләре турында мәгълүмат, татар халкының киләчәге һәм актуаль проблемалары турында дискуссион материаллар тәкъдим ителә. Моннан тыш, платформада төрле интерактив инструментлар гамәлгә ашырыла. Аерым алганда, сайтта һәр кеше дөньяның теләсә кайсы читенә  татар телендә открытка җибәрә алырга ярдәм итүче бит булдырылды. Рөстәм Миңнеханов акциягә кушылды һәм посткроссинг сервисы аша ике открытка җибәрде.

Шуннан соң Президент ике яңа татар радиостанцияләре эше белән танышты - «Китап» һәм «Тәртип». «Китап» тапшыруларының якынча 60% ы әдәби-агарту темаларына багышланган, калганын халык һәм классик жанр музыкасы алып тора. Музыкаль материал татар халкының традицион принципларына туры килә. Рөстәм Миңнехановка «Китап» радиосының социаль челтәрләрдә актив эшләве, шулай ук мобиль кушымта рәвешендә булуы турында сөйләделәр.

«Тәртип» радиоканалының концепциясе традицион мәдәниятне, ретро сәнгатьне, тарихны, туган якны өйрәнү, халык гореф-гадәтләрен популярлаштыруны күздә тота. Бүген эфирга 30дан артык үзләре җитештергән программалар чыга.

Рөстәм Миңнеханов «Тәртип» радиосы студиясен карап чыкты, радиостанция коллективы белән очрашты, шуннан соң туры эфирга чыкты. Президент билгеләп үткәнчә, бүген татар телле радиостанцияләре татар телен, милли мәдәниятне һәм гореф-гадәтләрне саклауга зур өлеш кертә. "Безнең халыкның мәдәнияте бик бай. Аны үстерергә, туган якка карата мәхәббәт һәм өлкәннәргә карата ихтирамлы мөнәсәбәт тәрбияләргә кирәк. Заманча радио моның өчен бик күп мөмкинлекләр бирә", - дип билгеләп үтте Рөстәм Миңнеханов һәм радиотыңлаучыларны якынлашып килүче Бөек Җиңү көне белән котлады.

Аннары ТР Президенты «Милли радио үсеше перспективалары» түгәрәк өстәлендә катнашучылар белән очрашты. Рөстәм Миңнеханов региональ радиотапшырулар вәкилләрен һөнәри бәйрәмнәре белән котлады. Ул цифрлы гасырда традицион татар радиосын да, радиостанцияләрне дә интернет-мәйданчыкларда активрак үстерергә кирәклеген билгеләп үтте.

Әңгәмә барышында Президентка барлык радиоканалларны татар телендә бердәм кушымта итеп берләштерергә тәкъдим иттеләр. Тыңлаучылар, радиоешлыкны эзләү өчен вакытын югалтмыйча, яраткан дулкынны сайлап алалар. Рөстәм Миңнеханов бу инициативаны хуплады.

Президент шулай ук татар музыкаль телеканалларының сыйфатлы үсеше кирәклеген ассызыклады. "Талантлы башкаручыларга ярдәм итәргә, җырлар яздырырга һәм видеоклиплар булдырырга ярдәм итәргә кирәк", - дип билгеләп үтте ул. Бу эшне ТР Президенты грант ярдәме системасы аша оештырырга тәкъдим итте.