Татарстан Президенты: Дзюдо – республикада иң популяр спорт төрләреннән берсе

Татарстан Республикасы Президенты Рөстәм Миңнеханов Казанда дзюдо буенча «Зур шлем» халыкара турнирын ачу тантанасында катнашты. Чарада шулай ук Россия Президенты ярдәмчесе Игорь Левитин, РФ спорт министры Олег Матыцин, Халыкара дзюдо федерациясе (IJF) Президенты Мариус Визер һәм Казан мэры Илсур Метшин катнашты. Тантана «Татнефть Арена» спорт сараенда узды.

Рөстәм Миңнеханов ассызыклаганча, республика өчен мондый әһәмиятле спорт чарасын кабул итү – зур дәрәҗә. «Татарстанда дзюдо спортның иң популяр төрләреннән берсе булып тора. Бүгенге көндә 4,5 меңнән артык спортчы көрәшнең бу төре белән шөгыльләнә, аларның саны елдан-ел арта гына бара», - дип ассызыклады ТР Президенты.

Ул Татарстанның эре спорт ярышларын оештыруда тәҗрибәсе зур булуын билгеләп үтте. «Безнең зур хыялыбыз бар – республикада дзюдо буенча дөнья чемпионатын уздыру», - дип өстәде Рөстәм Миңнеханов.

Игорь Левитин Россия Президенты Владимир Путин исеменнән котлау телеграммасын укыды. «Мондый дәрәҗәле һәм мәртәбәле ярышларны уздыру хокукы Россиягә бирелде. Безнең илдә һәрвакыт бу спорт төре, аның уникаль тарихы һәм фәлсәфәсе белән кызыксыну зур иде. Быелгы турнир әһәмиятле вакыйга булыр, дип ышанам, белгечләр һәм дзюдоның күп санлы хәйраннары игътибарын җәлеп итәчәк», - диелә телеграмма текстында.

Россия спорт министры, үз чиратында, Татарстан Республикасы җитәкчелегенә ярышларны югары дәрәҗәдә оештырулары өчен рәхмәт белдерде. «Бу катлаулы заманда сез традицион кунакчыллык һәм халыкара спорт форумнарын үткәргәндә профессионаллык күрсәтәсез», - диде Олег Матыцин.

Дзюдо буенча «Зур шлем» дөнья сериясе турниры Татарстан башкаласында 5-7 майда уза. Ярышлар Токиода узган Олимпия уеннарына квалификация этабы булып тора. Ярышларда 83 илдән 400дән артык спортчы катнаша. Россия җыелма командасыннан 55 атлет заявка биргән. Барлыгы 14 комплект медаль уйнатылачак.