ЕАЭС хөкүмәтләре башлыклары Татарстан Республикасы Президенты белән бергә «Казан Экспо»да булдылар

Бүген Казанга эш сәфәре кысаларында ЕАЭС илләре Премьер-министрлары «Казан Экспо» күргәзмә үзәгендә булдылар. Хөкүмәт башлыкларын Татарстан Республикасы Президенты Рөстәм Миңнеханов озата йөрде.

Исегезгә төшерәбез, Казанда Евразия хөкүмәтара советы чаралары уза (29-30 апрель).

Премьер-министрларга «Казан Экспо» комплексының өстенлекләре, аның конструктив үзенчәлекләре, шулай ук күргәзмә киңлекләрен алга таба файдалану планнары турында сөйләделәр.

Шулай ук ЕАЭС хөкүмәтләре башлыклары махсус күргәзмәне карадылар, аның кысаларында Татарстан Республикасының икътисадый һәм сәнәгать потенциалы белән таныштылар. Экспозициядә республика предприятиеләре продукциясе үрнәкләре тәкъдим ителде: «Аурус» автомобильләре, авыл хуҗалыгы техникасы, шина продукциясе, нефть химиясе продуктлары һ. б.