Татарстан Президентына Росприроднадзорның Идел-Кама төбәкара идарәсенең яңа җитәкчесен тәкъдим иттеләр

Бүген Татарстан Республикасы Президенты Рөстәм Миңнеханов Табигатьтән файдалану өлкәсендә күзәтчелек буенча федераль хезмәтнең (Росприроднадзор) дәүләт хезмәте һәм кадрлар идарәсе башлыгы Тимур Ахунҗанов белән очрашты.

Тимур Ахунҗанов Президентка Росприроднадзорның Идел-Кама төбәкара идарәсенең яңа җитәкчесен тәкъдим итте. Ул  –ТР экология һәм табигый байлыклар министрының беренче урынбасары – республиканың әйләнә-тирә мохитне саклау өлкәсендәге элеккеге Баш дәүләт инспекторы Фаяз Шакиров.

Шулай ук очрашу кысаларында Татарстан һәм Росприроднадзор арасында әйләнә-тирә мохитне саклау һәм табигатьтән файдалану өлкәсендә хезмәттәшлек итү мәсьәләләре буенча да фикер алыштылар.

Очрашуда ТР Премьер-министры Алексей Песошин, ТР Президенты Аппараты Җитәкчесе Әсгать Сәфәров, ТР экология һәм табигый ресурслар министры Александр Шадриков катнашты.