Рөстәм Миңнеханов Россия ЭЭМның Казан юридик институтында булды

Бүген Татарстан Республикасы Президенты Рөстәм Миңнеханов Россия Эчке эшләр министрлыгының Казан юридик институтында булды.

Россия ЭЭМ КЮИга 1974 елның 21 мартында нигез салынган, ул чакта СССР ЭЭМ академиясе каршындагы Мәскәү юридик читтән торып уку филиалы Казан укыту-консультация пункты оештырыла. 1994 елда – Россия Эчке эшләр министрлыгының Юридик институты филиалы, 1999 елда – мөстәкыйль югары уку йорты – Россия Эчке эшләр министрлыгының Казан юридик институты була.

Хәзерге вакытта институтта ТР буенча Эчке эшләр министрлыгы һәм Россия Эчке эшләр министрлыгының Киров өлкәсе буенча идарәсенең яңа кабул ителгән хезмәткәрләре уку уза, Россия Федерациясенең 57 субъектыннан эчке эшләр органнары хезмәткәрләре квалификацияләрен күтәрәләр. Ел саен 2 500дән артык кеше белем ала.

Рөстәм Миңнеханов һәм аны озата йөрүче затлар Россия ЭЭМ КЮИ чыгарылыш сыйныф укучыларының скульптура композициясе белән таныштылар, шулай ук Ватанны, закон һәм хокук тәртибен саклап, һәлак булган эчке эшләр органнары хезмәткәрләренең дан мемориалына чәчәкләр салдылар.

ТР Президенты югары уку йортының уку корпусында 1 нче каттагы холлны карады, анда Россия Федерациясе субъектлары флаглары, Россия ЭЭМ КЮИ Мактау тактасы, Россия ЭЭМ КЮИ Байрагы урнаштырылган.

Рөстәм Миңнехановка интерактив тирны күрсәттеләр, төрле корал төрләре белән таныштырдылар.

Тир 20 метрлы ату галереясе, ул 5-20 метр ераклыкта өч юнәлеш буенча утлы ату һәм гамәли ату буенча дәресләр үткәрү өчен билгеләнгән, атуның төрле шартларын имитацияләргә мөмкинлек бирә. Барлык ату юнәлешләре видеокамералар белән җиһазландырылган, видеосигналны видеомониторларга чыгарып, тирда коралның матди өлеше һәм башкарыла торган күнегүләрнең шартлары буенча дүрт укыту-күрсәтмә әсбап урнашкан.

Кунаклар шулай ук музей һәм Сугышчан Дан залын, актлар залын, китапханәне, уку аудиторияләрен, уку-укыту, уку, спорт, ял итү өчен билгеләнгән башка бүлмәләрне карап чыктылар.

Рөстәм Миңнехановны Татарстан Республикасы буенча Баш федераль инспектор Виктор Демидов, Татарстан Республикасы буенча Эчке эшләр министры Артем Хохорин, Татарстан Республикасы Президенты Аппараты Җитәкчесе Әсгать Сәфәров, Татарстан Республикасы мәгариф һәм фән министры Илсур Һадиуллин, Россия Эчке эшләр министрлыгының КЮИ башлыгы Фоат Зиннуров озата йөрде.