Рөстәм Миңнеханов табибларны һәм Роспотребнадзор хезмәткәрләрен Covid-19 пандемиясенә каршы көрәш өчен бүләкләде

Бүген Татарстан Республикасы Президенты Рөстәм Миңнеханов коронавирус пандемиясе белән көрәштә алдынгы Татарстан медицина хезмәткәрләренә һәм Роспотребнадзор хезмәткәрләренә дәүләт бүләкләре тапшырды. Тантаналы чара Казан Кремлендә узды.

"Пандемия барыбыз өчен дә, бигрәк тә сәламәтлек саклау системасы өчен җитди сынау булды. Медицина хезмәткәрләре йокысыз һәм ялсыз яңа дөнья куркынычы белән аяусыз көрәштеләр. Республиканың һәр кешесе сезнең һөнәри батырлыгыгыз белән чын күңелдән горурлана һәм соклана», - диде Рөстәм Миңнеханов.

Табибларга мөрәҗәгать итеп, ТР Президенты билгеләп үткәнчә, аларның күбесе атна дәвамында туганнары һәм якыннары белән аерым яшәгән, кеше мөмкинлекләре һәм көчләре чикләрендә Кызыл зоналарда кешеләр тормышы өчен көрәшкәннәр. Ашыгыч ярдәм, санитар авиация бригадалары хезмәткәрләре, гомуми практика табиблары, табиб-белгечләр, фельдшерлар һәм шәфкать туташлары, кече медицина персоналы, техника һәм машина йөртүчеләр - алар барысы да коронавируска каршы көрәшкә бәһасез өлеш керттеләр, дип ассызыклады Рөстәм Миңнеханов. "Безнең хәтеребездә башкалар өчен гомерләрен биргән кешеләр мәңгегә калды", - диде ул.

Президент Роспотребнадзорның хезмәткәрләрен аерым билгеләп үтте. «Әлеге ведомство хезмәткәрләре - гүзәл затлар. Сезнең нәзек җилкәләрдә зур җаваплылык ята - безнең республика халкы иминлеген яклау. Сез Covid-19га каршы көрәшнең алдынгы рәтендә", - диде ул.

«Сезгә чын күңелдән рәхмәт белдерәсем килә! Көч һәм сабырлык сезгә. Сез - безнең таянычыбыз!» - дип өстәде Рөстәм Миңнеханов.

Аннары Татарстан Президенты Россия Федерациясе һәм Татарстан Республикасы дәүләт бүләкләрен тапшырды. Барлыгы 49 кеше бүләкләнде.