2020 елда төзелеш өлкәсендә программаларны гамәлгә ашыруның якынча нәтиҗәләре турында Татарстан Республикасы Хөкүмәте йортында фикер алыштылар

Бүген 2020 елда төзелеш өлкәсендә программаларны гамәлгә ашыруның якынча нәтиҗәләре турында Татарстан Республикасы Хөкүмәте Йортында узган республика киңәшмәсендә Татарстан Республикасы төзелеш, архитектура һәм ТКХ министрының беренче урынбасары Алексей Фролов хәбәр итте.

Киңәшмәне республиканың барлык муниципалитетлары белән видеоконференцэлемтә режимында Татарстан Республикасы Президенты Рөстәм Миңнеханов уздырды. Киңәшмәдә Татарстан Республикасы Премьер-министры Алексей Песошин да катнашты.   

Алексей Фролов хәбәр иткәнчә, «Сәламәтлек саклау» программасына 51 объект кергән. 43 фельдшер-акушерлык пункты (ФАП) һәм 7 табиб амбулаториясе төзелгән. Биектау муниципаль районында гомуми практика табибы офисы объекты төзелеше тәмамланып килә.

2020 елга «Уңайлы шәһәр тирәлеген формалаштыру» программасы белән каралган 61 объектның 56сы файдалануга тапшырылган. Калган 5 объект тәмамлану стадиясендә (кече архитектура формалары эшләнә).

«Авыл хуҗалыгы» тармагында әлегә эшләр дәвам итә. Сыер абзарлары һәм сарык фермалары төзү программасы буенча 6 объект тәмамланган. Хәзерге вакытта эшләр соңгы объектта тәмамланып бара.

"Халыкка комплекслы хезмәт күрсәтүнең блок-модульле пунктларын төзү" программасы буенча пландагы 21 объектның 17се төгәлләнгән. Калган 4 объектта җиһазлар белән тәэмин итү бара, эшләр 25 декабрьгә тәмамланачак.

Алексей Фролов искәрткәнчә, иң зур республика программасы – балалар бакчалары төзелеше программасы. Аны финанслау күләме 5 млрд 200 млн сумнан артып китә. Бу – элеккечә үк  Россиядәге иң эре программаларның берсе. Агымдагы 2020 елда 22 мәктәпкәчә белем бирү учреждениесе төзелгән. Хәзерге вакытта төзелеп бетмәгән бер объект – «Көнбатыш Заречье» балалар бакчасы кала. Бу объектта эшләр 95 процент тәшкил итә.

ТР Төзелеш, архитектура һәм торак-коммуналь хуҗалык министрының беренче урынбасары шулай ук 2021 елга төзелеш өлкәсендә дәүләт программаларын әзерләү турында да сөйләде. Тормышка ашыру өчен 44 программа планлаштырылган. Хәзерге вакытта алар тиешле ведомстволарда килешү уза.