Татарстан Республикасы Президенты Чаллыда яңа онкология үзәген карады

Татарстан Президенты Рөстәм Миңнеханов Чаллыда яңа онкология үзәген карады. Аны ТР сәламәтлек саклау министры Марат Садыйков һәм автошәһәр мэры Наил Мәһдиев озата йөрде.

Амбулатор-поликлиника һәм радиология үзәкләре «ТР ССМ Республика клиник онкология диспансеры» ДАССОның Чаллы филиалын модернизацияләү кысаларында төзелде. Үзәкләр елына 100 мең кешегә һәм нур терапиясе сеансына исәпләнгән. Төзелеш РФ Хөкүмәте һәм ТР Хөкүмәте ярдәме белән мөмкин булды, ул «КАМАЗ» ГАҖның 50 еллыгына багышланган иде.

Проектны тормышка ашыру максаты – Татарстанның төньяк-көнчыгыш төбәгендә яман шешләрдән үлем очракларын 100 мең кешегә 175 очракка кадәр киметү, башлангыч стадияләрдә яман шешне ачыклау өлешен 65%ка җиткерү, яман шеш диагнозын билгеләгәннән соң биш еллык яшәү дәрәҗәсе кимендә 60% тәшкил итәргә тиеш.

Рөстәм Миңнеханов амбулатория корпусын, нур диагностикасы бүлеген, паллиатив бүлекне, поликлиниканы, функциональ диагностика бүлеген, морфология лабораториясен, операция блогын, палаталарны һәм радиотерапия корпусын карап чыкты.

Татарстан Республикасы Президентына хәбәр ителгәнчә, махсуслаштырылган онкология ярдәме күрсәтү буенча бөтен технологик цикл (профилактик эш, диагностика, махсуслаштырылган дәвалау, диспансер күзәтүе) бер урында тупланачак. Бу диагноз кую вакытын шактый киметергә, аның төгәллеген арттырырга һәм гражданнар тормышын саклап калу өчен махсус дәвалануны мөмкин кадәр тиз башларга мөмкинлек бирәчәк.

Соңгы ике елда кадрларны җәлеп итү һәм укыту буенча эш алып барылды. 31 белгеч эшкә алынды, шуларның 14е онколог, 2се рентгенолог, 3се ультратавыш диагностикасы табибы, 3 табиб – эндоскопист.

Бүгенге көндә төзелеш-монтаж эшләре 100%ка диярлек башкарылган. Хәзерге вакытта электр һәм аз эшләүче системаларны эшләтеп җибәрү һәм медицина җиһазларын монтажлау эшләре бара.

Рөстәм Миңнеханов башкарылган төзелеш эшләренең сыйфатын уңай бәяләде һәм яңа үзәк бәйрәмнәрдән соң ук эшли башларга тиеш, дип өстәде.