ТР Төзелеш министрлыгы: ел башланганнан бирле Татарстанда 2 млн 250 мең квадрат метр торак файдалануга тапшырылган

Хезмәтне саклау өлкәсендә Дәүләт төзелеш күзәтчелеге инспекциясе белгечләре ел башланганнан бирле 1 мең 205 тикшерү үткәргән. Хезмәтне саклау кагыйдәләрен һәм нормаларын бозган өчен 5 млн. 538 мең сумлык 128 карар чыгарылган. Үзлегеннән җайга салынучы оешмалар тарафыннан 1 мең 443 оешма – ҮҖО әгъзалары тикшерелгән. Дәүләт программалары кысаларында төзелә торган объектларда ТР Баш инвестицион-төзелеш идарәсе тарафыннан ел башыннан 2 мең 329 тикшерү үткәрелгән. 538 закон бозу очрагы ачыкланган, 497се бетерелгән. Бүген бу хакта Татарстан Республикасы Хөкүмәте Йортында узган республика киңәшмәсендә Татарстан Республикасы төзелеш, архитектура һәм ТКХ министры Марат Айзатуллин хәбәр итте.

Киңәшмәне барлык мунициципаль районнар белән видеоконференцэлемтә режимында Татарстан Республикасы Президенты Рөстәм Миңнеханов уздырды. Киңәшмәдә ТР Премьер-министры Алексей Песошин да катнашты.

Министр хәбәр иткәнчә, узган ике атна эчендә республикада 54 мең квадрат метр торак төзелгән. Ел башланганнан бирле 2 млн 250 мең квадрат метр торак файдалануга тапшырылган. 7 ноябрьгә булган мәгълүматларга караганда, республикада еллык план 75% ка үтәлгән. Биектау, Тукай, Питрәч һәм Апас районнарында еллык план 100% ка үтәлгән.

Хәзерге вакытта Татарстан Республикасы Президенты каршындагы Дәүләт торак фондының инвестицион программасы буенча статистика органнарына 2 мең 259 фатирга исәпләнгән 83 йорт буенча хисап бирелгән – бу еллык планның яртысыннан кимрәк – 49%. Хәзерге вакытта социаль ипотека программасы кысаларында төзелүче 47 йортның әзерлек дәрәҗәсе түбәндәгечә: 39 объект әзер диярлек, 8 объект уртача әзерлектә.

2020 елда республикада 177 күп фатирлы торак йорт файдалануга тапшырылырга тиеш. Бүгенге көндә 123 йорт файдалануга тапшырылган, ягъни планның 65%ыннан аз гына артыграк. Хәзерге вакытта программа буенча төзелүче 53 йорт әзер диярлек, 1 объект уртача әзерлектә.

Шәхси торак төзелешендә хәлләр яхшырак. 9 мең 670 торак йорт файдалануга тапшырылган, бу планның 90,5%ын тәшкил итә.

2020 елда 600 ятим баланы торак белән тәэмин итү планлаштырыла. Бүгенге көндә ТР Җир һәм мөлкәт мөнәсәбәтләре министрлыгы һәм Дәүләт торак фонды арасында 584 торак бина законлаштырылган. Алар арасында милек хокукы республикага беркетелгән һәм ятим балалар белән 304 урынга наем шартнамәләре төзелгән. 99 торак бинага милек хокукы Дәүләт торак фонды тарафыннан теркәлгән. 129 торак бина сату алды әзерлеге үтә. Файдалануга тапшырылмаган йортларда 52 торак бина бар, алар ятим балаларга тапшырылырга тиеш. Министрлыкның Җир ресурслары идарәсе белгечләре хәбәр итүенчә, Татарстан Республикасында барлыгы, Казан һәм Чаллы шәһәрләрен исәпкә алып, 22 671 җир кишәрлеге кадастр исәбендә теркәлгән.

7 ноябрьгә яшь гаиләләрне торак белән тәэмин итү буенча исемлеккә кертелгән 47 кешенең 45енә субсидияләр күчерелгән. Күп балалы гаиләләрне торак белән тәэмин итү буенча 46 күп балалы гаиләгә сертификатлар рәсмиләштерелгән. Торак белән тәэмин итү буенча мәҗбүри күченүчеләр, Ерак Төньяктан күченүчеләр һәм чернобыльчеләр арасыннан 24 гражданга 23 сертификат рәсмиләштерелгән, шуларның 19ы тормышка ашырылган.

Нотыкның икенче блогы социаль-мәдәни объектлар төзү программаларын гамәлгә ашыруга багышланды. Мәгариф өлкәсендә мәктәпкәчә белем бирү учреждениеләрен төзү программасы гамәлгә ашырыла. Ел ахырына кадәр 22 балалар бакчасы файдалануга тапшырылырга тиеш. Төзелеш-монтаж эшләре шуларның 20сендә тәмамланган. Ике объект төзелеп бетү стадиясендә.

ТР халкына беренчел медик-санитар ярдәм күрсәтүне камилләштерүгә юнәлдерелгән чаралар кысаларында төзелеш өч юнәлеш буенча алып барыла: ФАПлар, табиб амбулаторияләре, гомуми практика табибы офисы төзү. 2020 елда планлаштырылган 43 фельдшер-акушерлык пунктының 32сендә эшләр тәмамланган. 11 ФАПта әлегә эшләр дәвам итә. Ел ахырына 7 табиб амбулаториясе тапшырылырга тиеш. Дүрт амбулатория төзелгән, калган өчесендә төзү-монтаж эшләре ахырына якынлаша. Шулай ук быел Биектау районында гомуми практика табибы офисы да тапшырылырга тиеш.

«Спорт» тармагында өч юнәлеш буенча бер программа гамәлгә ашырыла: универсаль спорт мәйданчыклары, блок-модульле чаңгы базалары, Зеленодольскта ябык футбол манежы төзелеше. Зеленодольскта чаңгы базалары һәм ябык манеж төзелеше тәмамланган. Ә агымдагы елда тапшырылырга тиешле 86 спорт мәйданының өчесе генә (барысы да Апас районында) эшләнеп бетмәгән.

Татарстанда балалар сәламәтләндерү лагерьларын төзү буенча масштаблы программа гамәлгә ашырыла, аның кысаларында 2020 елда 8 объект төзү һәм бер объектны реконструкцияләү планлаштырылган. Хәзерге вакытта 9 объектның өчесе эштә.

«Мәдәният» тармагында авыл клублары төзү программасы эшли. 12 объектның 5сендә әлегә эшләр дәвам итә.

«Авыл хуҗалыгы» тармагында төзелеш эшләре 2 республика программасы кысаларында алып барыла. «Сыер абзарлары һәм сарык фермалары төзелеше» программасы буенча эшләр 7 объектның 3сендә дәвам итә. Ноябрь ахырында 79 силос-сенаж траншеясы төзү программасы буенча эшләрне тәмамлау планлаштырыла.

Шулай ук халыкка комплекслы хезмәт күрсәтү буенча блок-модульле пунктлар төзелеше дә алып барыла. Агымдагы елда файдалануга тапшырырга планлаштырылган 21 объектның барысы да эшләнә.

Авыл җирлекләре Советлары биналарын төзү буенча 11 объектның 7сендә эшләр дәвам итә.