Рөстәм Миңнеханов: Татарстан машина төзүчеләре икътисад үсешенә һәм илнең оборона сәләтен ныгытуга лаеклы өлеш кертәләр

Татарстан машина төзүчеләре икътисад үсешенә һәм илнең оборона сәләтен ныгытуга лаеклы өлеш кертәләр. Бүген бу хакта Татарстан Республикасы Президенты Рөстәм Миңнеханов Машина төзүчеләр көненә багышланган чарада хәбәр итте.

Тантана башланыр алдыннан Татарстан Республикасы Президенты республика предприятиеләренең машина төзелеше продукциясе күргәзмәсе белән танышты.

Чарада катнашучыларны сәламләп, Рөстәм Миңнеханов билгеләп үткәнчә, Татарстан – бөтен Россиядщ һәм чит илләрдә танылган алдынгы сәнәгать төбәге. Бүген республикада 3 меңнән артык машина төзелеше предприятиесе эшли, аларда 120 меңгә якын кеше эшли.

Татарстан Республикасы Президенты республика машина төзелеше үсешенең тарихына җентекләп тукталды. 20 гасыр башында әле яшь республикада машина төзелешендә берничә предприятие генә иде. Индустриальләштерүгә алынган курс беренче биш елда төрле тармакларда 100 дән артык җитештерү төзергә мөмкинлек бирде. Сугыш елларында Татарстанда куәтле тыл сәнәгате формалаша. 70 эвакуацияләнгән завод һәм фабрика базасында яңа производстволар барлыкка килә: вертолетлар төзелеше, медик-инструменталь, оптика-механика һәм сәгать җитештерүләре һәм башкалар. Сугыш елларында предприятиеләр фронтка 600 төрдән артык корал һәм сугыш кирәк-яраклары җибәрә. Казанда әйдәп баручы совет галимнәре һәм конструкторлары: Туполев, Королев, Капица, Курчатов һәм башкалар эшли. Рөстәм Миңнеханов Бөек Җиңүгә бәһасез өлеш керткәннәре өчен тыл хезмәтчәннәренә рәхмәт белдерде.

Агымдагы елда Россия Президенты Указы белән «Хезмәт даны шәһәре» исеме бирелде. Моннан тыш, Татарстанның ун заводына «Хезмәт даны предприятиесе» дигән мактаулы исем бирелде. «Бу исемлекне киңәйтергә һәм лаеклы кешеләрне билгеләп үтәргә кирәк дип саныйм», - диде Татарстан Президенты.

Сугыштан соңгы елларда республикада «Казанкомпрессормаш» һәм «Теплоконтроль» кебек уникаль җитештерүләр булдырылды. Республиканың көньяк-көнчыгышында нефть чыгару үсешенә бәйле рәвештә Әлмәт торбалар заводы, Бөгелмә электр насослары заводы, «Алнас»заводы төзелде.

70 нче елларда Татарстан сәнәгате яңа үсеш алды, дип дәвам итте Рөстәм Миңнеханов. «КАМАЗ» автогиганты – илебез машина төзелеше лидеры. Чаллы һәм Түбән Кама шәһәрләре төзелә башлады. 90 нчы елларның катлаулы чорында республикада эре предприятиеләрне саклап калу гына түгел, җитештерүне модернизацияләү, яңа перспективалы продукция төрләрен үзләштерү дә мөмкин булды.

«Татарстанда соңгы 10 елда машина төзелеше тарафыннан төяп җибәрелгән продукция күләме 2 тапкырга – елына 550 млрд. сумга кадәр артты. Казан, Чаллы, Зеленодольск кебек традицион сәнәгать үзәкләре белән беррәттән, кече шәһәр һәм районнарда предприятиеләр дә үсеш ала", - диде Рөстәм Миңнеханов.

Ул билгеләп үткәнчә, агымдагы елда, катлаулы шартларга карамастан, Татарстан җитештерүчеләре хезмәте нәтиҗәсендә машина төзелеше ныклы фундаментка ия булуын исбатлады. Предприятиеләр коллективларын саклап калдылар һәм билгеләнгән проектларны гамәлгә ашыруны дәвам иттеләр. Кайбер заводлар шәхси саклану чараларын җитештерүне оператив үзләштерделәр. "Ярдәм янәшәдә!" хәрәкәте кысаларында бик кирәкле эш башкарылды. «Бу эшкә керешкән компанияләргә рәхмәт сүзләрен җиткерәсем килә. Шулай ук тармак ветераннарына аерым рәхмәт белдерәм", – диде ТР Президенты.

Рөстәм Миңнеханов ассызыклаганча, яшьләр өлкән буын башлаган эшне лаеклы дәвам итә. «Машина төзелеше» компетенциясе буенча татарстанлылар Россия җыелма командасы составында узган «Ворлдскиллс» дөнья чемпионатында 4 медаль (2 алтын һәм 2 бронза) яулады. Быел илкүләм чемпионат кысаларында алар үзләренең осталыкларын расладылар һәм 23 медаль яуладылар (9 алтын, 7 көмеш, 7 бронза). Шулай ук балалар техник иҗатына да зур игътибар бирелә. "Болар барысы да эшче һәм инженер һөнәрләренең абруен күтәрүгә ярдәм итә", - дип өстәде ТР Президенты.

Рөстәм Миңнеханов республиканың барлык машина төзүчеләрен һәм тармак ветераннарын һөнәри бәйрәмнәре белән котлады, шулай ук Татарстан Республикасы дәүләт бүләкләрен тапшырды.