Рөстәм Миңнеханов: Республиканың бер гасырлык юбилее татарстанлыларның мөһим бердәмлек факторына һәм горурлык предметына әверелде

Республиканың бер гасырлык юбилее татарстанлыларның мөһим бердәмлек факторына һәм горурлык предметына, шулай ук бөтен ил өчен әһәмиятле датага әверелде. Бүген бу хакта Татарстан Республикасы Президенты Рөстәм Миңнеханов Татарстан Республикасы төзелүнең 100 еллыгына әзерлек һәм  бәйрәм итү буенча оештыру комитеты утырышында хәбәр итте. Чара Россия Федерациясе Хөкүмәте Рәисе урынбасары Марат Хөснуллин рәислегендә узды. Утырышта Татарстан Республикасы Дәүләт Киңәшчесе, Россия Федерациясе Хезмәт Герое Минтимер Шәймиев, Татарстан Республикасы Дәүләт Советы Рәисе Фәрит Мөхәммәтшин, РФ Мәдәният министры урынбасары Владимир Осинцев һәм башкалар катнашты. Чара Казан Ратушасында узды.

РФ вице-премьеры Марат Хөснуллин ассызыклаганча, Татарстан Республикасы социаль-икътисадый үсеше ягыннан илкүләм проектларны үтәү буенча тотрыклы рәвештә алдынгы өчлеккә керә. «Без Казан һәм республиканың башка шәһәрләренең ничек яңара баруын, мәдәни мирасның тарихи объектларының һәм заманча хәл ителешләрнең бер-беренә ничек күркәм туры китерелүен күрәбез», - диде ул.

Марат Хөснуллин билгеләп үткәнчә, бәйрәмгә әзерлек чаралары планына 4 бүлек, 76 чара кертелгән. Күп өлеше – мәдәни-мәгариф, фәнни-мәгариф проектлар, тантаналы чаралар.

Рөстәм Миңнеханов билгеләп үткәнчә, утырыш республиканың туган көнендә уздырыла, бу көнне Ленин декреты белән Татарстан автономияле республикасы реаль хакимият вәкаләтләренә ирешә. «Без Россия Федерациясе Президенты Владимир Путинга Татарстан Республикасы төзелүнең 100 еллыгын бәйрәм итү турындагы указы өчен рәхмәтлебез», - диде ул.

Татарстан Президенты хәбәр иткәнчә, юбилей тантаналарына үткән елның декабрь аенда «Казан Экспо» күргәзмә үзәгендә узган чарада старт бирелде. Коронавирус пандемиясе бу планнарны беркадәр үзгәртте, диде ТР Президенты.

Рөстәм Миңнеханов билгеләп үткәнчә, быел 27 майда, «Татарстан Автономияле Совет  Социалистик Республикасы турында» декретка имза салуның 100 еллыгына багышлап, Татарстан Республикасы Дәүләт Советының тантаналы утырышы узды. Бүген 25 июньдә – нәкъ 100 ел элек Казан губисполкомы рәисе автономия игълан итүгә багышланган тантаналы җыелышта ТАССР Вакытлы ревкомына хакимият тапшыру турында хәбәр иткән», - диде ТР Президенты.

Рөстәм Миңнеханов федераль башкарма хакимият органнарына бу чараларны гамәлгә ашыруда актив катнашканнары өчен рәхмәт белдерде.  

Минтимер Шаймиев билгеләп үткәнчә, икътисадый өлкәдәге уңышлардан тыш, милләтара һәм динара тынычлык һәм татулык, Татарстан Республикасы территориясендә яшәүче барлык милләт кешеләре арасында дуслык республиканың мөһим казанышларыннан булды.

Аннары ТАССР 100 еллыгы хөрмәтенә уздырылучы чаралар турында Татарстан Республикасы Премьер-министры урынбасары Васил Шәйхеразыев, Россия Федерациясе Мәдәният министры урынбасары РФ Владимир Осинцев һәм Татарстан Республикасы төзелеш, архитектура һәм ТКХ министры Фәрит Хәнифов чыгыш ясады.