Алексей Песошин ТАССР башкарма хакимиятенең 100 еллыгы уңаеннан мемориаль такта ачылышында катнашты

Бүген Татарстан Республикасы Дәүләт сынлы сәнгать музее бинасы фасадына республика башкарма хакимияте органнары төзелүгә 100 ел тулу уңаеннан мемориаль такта ачылышы узды.

Тантаналы чарада Татарстан Премьер-министры Алексей Песошин, Татарстан Дәүләт Советы рәисе Фәрит Мөхәммәтшин һәм Россия мәдәният министры урынбасары Владимир Осинцев катнашты.

Татарстанның Сынлы сәнгать музее Карл Маркс урамы, 64 йортта тарихи бинада урнашкан. Анда беренче Советлар йорты урнашкан була. Нәкъ шушында 1920 елның 25 июнендә Казан губерна башкарма комитеты хакимият вазифаларын ТАССРның Вакытлы Революция комитетына тапшыра, аның беренче хакимият органнары формалаша. Вакытлы Революция комитеты җитәкчесе, беренче Хөкүмәт рәисе итеп Сәхибгәрәй Сәетгалиев билгеләнә.

“Бүген без тарихи һәм иҗтимагый әһәмияткә ия вакыйганы мәңгеләштерәбез. Нәкъ менә биредә РСФСРның беренче милли республикаларыннан һәм субъектларыннан берсе булган Татарстан Республикасы оештырыла. Татарстан Республикасының заманча статусын торгызуда катнашкан һәркемгә тирән хөрмәтебезне белдерәбез”, - дип ассызыклады Алексей Песошин.

Фәрит Мөхәммәтшин мемориаль такта ачу татарстанлыларга республика тарихына тагын бер кат игътибар итәргә мөмкинлек бирәчәк дигән ышаныч белдерде.

“Бүген республикабыз өчен бик тантаналы һәм истәлекле көн. 100 ел элек бу бинада Татарстанның беренче башкарма хакимияте оештырыла. Безнең элгәрләребез бүген илебезнең алдынгы төбәкләренең берсе булган республикабыз үсешенә бик зур өлеш керткәннәр”, - диде ул.

Рус һәм татар телләрендә язылган мемориаль тактаны төп керү урыны янында урнаштырдылар.

Аннары Алексей Песошин, Фәрит Мөхәммәтшин һәм Владимир Осинцев ТР Дәүләт сынлы сәнгать музеен карадылар, анда күптән түгел төзекләндерү-реставрацияләү эшләре төгәлләнгән.