Рөстәм Миңнеханов антисептик чаралар белән тәэмин итү мәсьәләсен шәхсән тикшереп торачак

Бүген Татарстан Республикасы Президенты Рөстәм Миңнеханов Казанда «Аромат» АҖ предприятиесендә булды. Предприятие җитәкчелеге белән ул дезинфикацияләүче чараларын җитештерү күләмнәрен арттыру мөмкинлеге турында фикер алышты. 

Рөстәм Миңнеханов хәбәр ителгәнчә, антисептик чаралар (дезинфикацияләүче чаралар, гигиеник гельләр һәм куллар һәм өслекләр өчен спрейлар), шул исәптән сәнәгать һәм автотранспорт предприятиеләре өчен зур күләмле тараларда боларны җитештерү өчен предприятиенең җитештерү куәтләре җитәрлек. Моның өчен махсус акциз гына кирәк. 

Махсус санитар-эпидемиологик режимда кешеләр иминлеген тәэмин итү турында сүз барганга күрә, Рөстәм Миңнеханов бу мәсьәләне шәхсән тикшереп торачак.

Искәртәбез, дезинфикацияләүче чаралар, шул исәптән куллар өчен  антисептик гельләр – «Аромат» АҖнең иң сорала торган продуктларыннан берсе.

«Интернетта хәзер антисептик чараларны бик кыйбатка сатучы спекулянтлар күбәйде. Антисептикларны җитәрлек санда сатуны сәүдә һәм аптека челтәрләре аша тәэмин итәргә кирәк», - дип белдерде Татарстан Президенты. 

Искәртәбез, моңарчы Рөстәм Миңнеханов Татарстан Республикасының гадәттән тыш хәлләрне кисәтү һәм булдырмау идарәсе органнары һәм территориаль подсистемасы көчләре өчен югары дәрәҗәдәге әзерлек режимын кертү турында күрсәтмә чыгарган иде.

Рөстәм Миңнеханов катгый бурыч куйды – махсус режимның барлык таләпләрен дә үтәргә. Ул ассызыклаганча, бу чаралар гражданнарның, беренче чиратта, олы яшьтәгеләрнең һәм балаларның, сәламәтлеген кайгыртып игълан ителә.

Кичә Татарстан Республикасы Президенты продуктларга һәм киң куллану әйберләренә кытлык булмавына шәхсән ышану өчен Казандагы күпләп һәм ваклап сату үзәкләренең берсендә булды.  Моннан тыш, кичә Рөстәм Миңнеханов шулай ук читтән торып укытуны да үзе тикшерде.