Рөстәм Миңнеханов: Ишегаллары территорияләрен төзекләндергәндә безнең шәһәрләрнең үзенчәлеген исәпкә алырга кирәк

Бүген Казанның «Сәйдәш» мәдәният сараенда «Безнең ишегалды» республика программасын гамәлгә ашыру кысаларында мәгариф воркшопына йомгак ясадылар. Чарада Татарстан Республикасы Президенты Рөстәм Миңнеханов, Татарстан Республикасы Президенты ярдәмчесе Наталия Фишман-Бекмамбетова, Казан мэры Илсур Метшин, Чаллы мэры Наил Мәһдиев, республика министрлыклары һәм ведомстволары вәкилләре катнашты. 

Искәртәбез, мәгариф воркшопы 27 гыйнварда башланып китте. Чараның төп максаты ишегаллары территорияләрен комплекслы үстерү тәкъдимнәрен әзерләү, аларны хәл итү юлларын ачыклау, шулай ук программаны гамәлгә ашыруга карата системалы алымнар табу иде.

Бүген йомгаклау тәкъдир итүе барышында Казан, Чаллы, Әлмәт һәм Арча (авыл ишегаллары) ишегаллары территорияләрен төзекләндерү проектлары тәкъдим ителде.

Рөстәм Миңнеханов билгеләп үткәнчә, һәр муниципаль берәмлекнең үз характерлы үзенчәлеге бар. Шуңа күрә ишегалларын төзекләндерү проектлары шулар нигезендә эшләнә. «Без төрле җирдә төрле алымнар күрәбез. Бу Казанга да, Чаллыга да, башка шәһәрләргә дә кагыла. Без, барлык үзенчәлекләрне исәпкә алып, һәр территория өчен үз „рецепт“ын әзерләргә тиеш», - диде ул. 

Татарстан Президенты ассызыклаганча, «Безнең ишегалды» республика программасын гамәлгә ашыру кешеләр белән берлектә алып барылырга тиеш, аларның теләкләрен һәм мәнфәгатьләрен исәпкә алырга кирәк. Рөстәм Миңнеханов тагын билгеләп үткәнчә, халыкка барысын да аңлатып бирергә кирәк булачак. «Воркшоп барышында белгечләр сөйләгән нәрсәләр безнең өчен яңалык. Безнең гражданнар да бу нечкәлекләрне белмиләр. Шуңа күрә сабыр гына эшнең ничек оештырылуын аңлатып бирергә кирәк», - диде Рөстәм Миңнеханов. 

Татарстан Президенты ассызыклаганча, халык белән эшләү – иң катлаулысы да булырга мөмкин. «Әлбәттә, бу яңалыклар барысына да ошамаячак. Шуңа да карамастан, кешеләр белән сөйләшергә, барлык сорауларына да җавап бирергә кирәк. Универсиадага әзерлек вкытын искә төшерегез. Ул чакта күпләр ремонт эшләре аркасында юлларда машиналар тыгылып ятуын өнәмәделәр. Ә нәтиҗәдә казанлыларга яңа төзелгән юллар аерылышлары күп проблемларны хәл итәргә мөмкинлек бирде», - диде Рөстәм Миңнеханов. 

Ул билгеләп үткәнчә, Татарстан асылда ишегаллары киңлекләрен төзекләндерүнең зур масштаблы программасын гамәлгә ашыру буенча сынау мәйданчыгына әверелә. Киләчәктә республика тәҗрибәсе бөтен ил буйлап таралырга мөмкин. «Беренче елны катлаулы булачак, күбесен кулдан эшләргә туры киләчәк. Ахыр чиктә без кешеләр, республика һәм ил өчен файдалы эш эшлибез икән – димәк, эшебез бушка китмәячәк», - диде Рөстәм Миңнеханов.