Татарстан АЗСларында сатыла торган ягулыкның сыйфаты яхшырган

Узган ел белән чагыштырганда, быел Татарстан АЗСларында мотор ягулыгының сыйфаты яхшырган. Бу хакта бүген ТР Министрлар Кабинетында брифингта билгеле булды.

“Ягулык-энергетика ресурсларын рациональ куллану идарәсе” ДБУ җитәкчесе Роберт Гыйләҗиев 28 октябрьдән ягулык сыйфатын тикшерү айлыгы узганын әйтте. Бу вакыт эчендә экспертлар Татарстанның 401 АЗС һәм өч нефтебазасында 719 ягулык үрнәген алган.

Айлык нәтиҗәләре буенча, тикшерелгән ягулык үрнәкләренең 2,1%ында, ягъни унбишендә нормадан тайпылыш ачыкланган. Былтыр бу күрсәткеч 4,3% дәрәҗәсендә булган. “Татарстан АЗСларынңда ягулыкның сыйфаты яхшыру күзәтелә”, — ди Роберт Гыйләҗиев.

Ел башыннан идарә белгечләре республика АЗСларыннан 1,9 меңнән артык ягулык үрнәген тикшереп караган. Нормадан тайпылыш 2,6% дәрәҗәсендә ачыкланган. 2018 елда бу күрсәткеч 3,7% тәшкил иткән.

Идарә җитәкчесе сүзләренчә, бүген ягулык составында күкерт 1 кг га 10 мг тиеш. Күкерт күләме соңгы ун белән чагыштырганда, 100 тапкыр кимегән.