Алексей Песошин Казанда республикадагы иң зур мәктәпне - күп профильле 185нче лицейны ачты

Бүген Татарстан Премьер-министры Алексей Песошин Казанның “Весна” торак комплексында күп профильле 185нче лицей ачылышы тантанасында катнашты.

Татарстан Премьер-министры барысын да бәйрәм белән – Белем көне һәм яңа уку елы башлану белән котлады.

Татарстанда мәгариф системасын үстерүгә зур игътибар бирелә, дип билгеләде ул. Быел гына биш яңа мәктәп тапшырылачак, яңа уку елына 36 мәктәп төзекләндерелде. Мәктәп өчен уку классларына һәм лабораторияләргә җиһазлар сатып алына.

“Белем көнендә яңа мәктәпләр ачу матур гадәткә әверелде,- диде Алексей Песошин. Барлык укучыларга уңышлар, укытучыларга яңа иҗади ачышлар, ата-аналарга тынычлык телим”.

Тантаналы линейкадан соң Алексей Песошин һәм аны озата йөрүчеләр яңа бинаны карадылар. Мәктәп 1501 балага исәпләнгән.