«Иннополис» МИЗ Күзәтүчеләр советы яңа резидентлар заявкаларын хуплады

Бүген Татарстан Республикасы Президенты Рөстәм Миңнеханов рәислегендә «Иннополис» махсус икътисадый зонасы Күзәтүчеләр советының чираттагы утырышы узды.   

Утырыш Татарстан Республикасы Хөкүмәте йортында барды.

Резидент статусын түбәндәге компанияләр алды: «ННГ Казань» ҖЧҖ, «Мэгис Казань» ҖЧҖ, «СДС Телеком» ҖЧҖ, «ТРАНСПЭРЕНТ ТЕХНОЛОДЖИ» ҖЧҖ, «ДжиДиСи Сервисез» ҖЧҖ, «Интеллектуальная видеоаналитика» ҖЧҖ, «Би Пи Эм Энвайронмент» ҖЧҖ.

«Газпромнефть-Снабжение» ҖЧҖ һәм «Консист-ОС» АҖ «Иннополис» МИЗ партнерлары булды.

«Газпромнефть-Снабжение» ҖЧҖ – «Газпром нефть» ГАҖның ярдәмче компаниясе, «Консист-ОС» АҖ – «Концерн Росэнергоатом» АҖнең ярдәмче компаниясе.

Тәкъдим  ителгән компанияләр түбәндәге өлкәләрдә программалар белән тәэмин итү белән шөгыльләнәләр: автомобиль һәм аэрокосмик сәнәгать өчен навигацияләр системасы; дәвалау-профилактика учреждениеләре пациентлары өчен лояльлек системасы; торак-коммуналь хуҗалыкны цифрлаштыру; ясалма интеллектны гамәлгә кертү исәбенә видеокүзәтүләр нәтиҗәлелеген арттыру; товарлар һәм хезмәт күрсәтүләр китереп тору чылбырларына идарәнең бизнес-процессларын интеграцияләү һәм цифрлаштыру.