Татарстанда экология чараларында миллионнан артык кеше катнашкан

Быел республиканың торак пунктлары территорияләрен чистарту буенча санитар-экологик ике айлыкта 1 178 000 кеше катнашкан. Бу хакта Хөкүмәт йортында узган брифингта Татарстаның экология һәм табигать ресурслары министры Александр Шадриков сөйләде.

“Татарстанлылар тирә-якны чистарту эшендә актив булды. Елдан-ел катнашучылар саны арта бара, узган ел бу күрсәткеч 1 168 000не тәшкил итте”, - диде ул.

Шулай итеп, чарага җәлеп ителгән кешеләр саны Казан халкы кадәр диярлек - шәһәрдә хәзер 1 251 969 кеше яши.

Ике айлык барышында барлыгы 3759 мөрәҗәгать кабул ителгән. Әйләнә-тирәне чистарту эшендә мәктәп балалары да читтә калмаган.

“Халык контроле” системасы һәм “Мәктәп эко-патруле” республика конкурсына биш ай эчендә 3109 хат килеп ирешкән.

Ике айлык барышында җыештыру эшендә 13,5 берәмлек техника җәлеп ителгән, бер миллион агач һәм куаклар утыртылган. Балалар мәйданчыклары, чүп савытлары төзекләндерелгән.