Рөстәм Миңнеханов Мәскәүдә Россия Федерациясе Дәүләт Советының торак төзелешен һәм уңайлы шәһәр тирәлеген үстерү турында эш төркеменең чираттагы утырышын уздырды

Бүген Татарстан Республикасы Президенты, эш төркеме җитәкчесе Рөстәм Миңнеханов «Россия Федерациясендә торак төзелешен һәм уңайлы шәһәр тирәлеген үстерү турында»гы мәсьәлә буенча Россия Федерациясе Дәүләт Советының эш төркеме нең чираттагы утырышын уздырды.  

Утырыш Мәскәүдә узды.

Утырышны ачып, Рөстәм Миңнеханов искәрткәнчә, эш төркеме бу мәсьәләне шул исәптән Россия Президенты Владимир Путинның Россия Федерациясе Дәүләт Советы президиумының 2019 елның февралендә Казанда узган «Россия Федерациясе субъектлары башкарма хакимият органнарының халыкның тормыш шартларын яхшыртуга һәм уңайлы шәһәр тирәлеген формалаштыруга юнәлгән эше турында»гы мәсьәлә буенча киңәйтелгән утырышы нәтиҗәләре  буенча бирелгән йөкләмәләрен үтәү йөзеннән дә карый.

Бүген эш төркеме әгъзалары быел 1 июльдән торак төзелешендә катнашучыларның, эскроу-счетлар кулланып, проект финанславы системасына күчү мәсьәләсен карады.

Экспертлар фикеренчә, эскроу-счетлар ачып, төзелеш алып баручыларны проект финанславы системасына күчерү темасы бик актуаль.  

Рөстәм Миңнеханов фикеренчә, бүген проект финанславы системасына күчүне оптимальләштерү өчен әлеге ситуация буенча Россия Федерациясе Төзелеш министрлыгы, Россия Федерациясе субъектлары башлыклары белән бергә фикер алышырга кирәк. 

Рөстәм Миңнеханов шулай ук искәрткәнчә, Россия Федерациясе Президенты В.В.Путинның җәмәгатьчелек вәкилләре белән очрашуы йомгаклары буенча (2019 елның феврале) эш төркеменә фикер алышу өчен берничә йөкләмә бирелгән (Пр-754 от 30.04.2019). Аерым алганда, йөкләмәләрнең берсе – экспертлар берлеге вәкилләрен җәлеп итеп, гражданнарның шәһәр тирәлеген үстерүдә катнашулары мөмкинлеген арттыру.   

«Җәмәгать киңлекләрен үстерү темасы бик мөһим», - диде Рөстәм Миңнеханов. Ул хәбәр иткәнчә, Татарстан Республикасында җаваплы ведомстволарга җәмәгать киңлекләрен барлау йөкләмәсе бирелгән. Оптималь форманы билгеләргә, чыгымнарны исәпләп чыгарырга кирәк, диде Рөстәм Миңнеханов.

Моннан тыш, Рөстәм Миңнеханов билгеләп үткәнчә, бүген шулай ук гражданнарга җәмәгать киңлекләрен үстерү өлешендә аңлату эшләре дә алып бару мөһим.

Утырышта Россия Төзелеш һәм торак-коммуналь хуҗалыгы министры урынбасары Максим Егоров, «Банк ДОМ.РФ» АҖ идарәсе рәисе, «ДОМ.РФ» АҖ генераль директоры урынбасары Артём Федорко, Россия Төзелеш һәм торак-коммуналь хуҗалыгы министры урынбасары Никита Стасишин да чыгыш ясады.