Рөстәм Миңнеханов Красноярскта Бөтендөнья кышкы Универсиадасын ачу тантанасында катнашты

Татарстан Республикасы Президенты Рөстәм Миңнеханов Красноярскта XXIX Бөтендөнья кышкы Универсиадасын ачу тантанасында катнашты. Тантана «Платинум Арена Красноярск»та узды.

Спортчыларны тәкъдим итү тантанасыннан һәм парадыннан соң чарада катнашучыларга Россия Федерациясе Президенты Владимир Путин мөрәҗәгать итте. «Бүген Красноярскта, безнең бөек Себер елгабыз Енисей ярларында бөтендөнья студентлар спорты бәйрәме, яшьлек һәм дуслык, нык һәм гадел көрәш бәйрәме уза», - диде ул.

Дәүләт башлыгы билгеләп үткәнчә, ярышларга дөньяның дистәләгән илләреннән меңнәрчә атлетлар килгән. «Спортчылар үз осталыкларын, көчләрен, тизлекләрен, чыдамлы булуларын һәм, әлбәттә, җиңүгә омтылышларын, нык характерлы булуларын һәм көндәшләренә хөрмәтләрен күрсәтәчәкләр. Ышанам, бу көннәр сезнең һәрберегезнең күңелендә мәңге калачак, бары тик иң шатлыклы мәрхәмәт хисләре калдырачак һәм,  һичшиксез, бөтендөнья спорты тарихына якты сәхифә булып кереп калачак», - диде Владимир Путин.

Россия Президенты Россиядә узган эре спорт вакыйгаларын, шул исәптән Казандагы Универсиада-2013не, Сочидагы Олимпия уеннарын һәм Футбол буенча дөнья чемпионатын искә алды. 

«Россия үзе катнашкан барлык эре спорт форумнарын лаеклы, шул ук вакытта югары дәрәҗәдә уздырды. Үз кунакларыбызны без һәрвакыт русча киң күңел белән каршы алабыз. Сезнең барыгызга да: спортчыларга, тренерлар штабларына һәм федерацияләргә спорт идеалларына тугры калганыгыз, аның иң яхшы традицияләрен үтәгәнегез өчен рәхмәт», - дип мөрәҗәгать итте ул чарада катнашучыларга.

«Барыгызны да ярышлар башлану белән тәбрик итәм һәм уңышлар, күркәм, матур җиңүләр телим.

XXIX Бөтендөнья кышкы универсиадасын ачык дип игълан итәм!» - диде  Владимир Путин. 

XXIX кышкы студентлар уеннары 2-12 мартта барачак. Беренче мәртәбә кышкы Универсиада Россиядә узачак. Барлыгы 11 спорт төрендә 76 комплект медаль уйнатылачак. Алдан узучы ярышлар җомга көнне старт алды, беренче медальләр 3 мартта тапшырылды.

Красноярскта Универсиадалар тарихында беренче тапкыр чаңгыда спорт ориентирлашуы һәм туплы хоккей ярышлары булачак. Моннан тыш,  биатлон, тау чаңгысы спорты, кёрлинг, чаңгы узышлары, сноуборд, фигуралы шуу, фристайл, алкалы хоккей, шорт-трек буенча ярышлар барачак.