Казанга РФ Хөкүмәте Рәисе урынбасары Максим Акимов килде

Бүген Россия Хөкүмәте Рәисе урынбасары Максим Акимов Татарстанга эш сәфәренә килде. «Казан» халыкара аэропортында аны Татарстан Республикасы Президенты Рөстәм Миңнеханов каршы алды. 

Эш сәфәре кысаларында Максим Акимов Иннополис ИТ-шәһәрендә булачак. РФ вице-премьеры «Цифрлы икътисад» үтәли технологияләр программасы кысаларында Иннополис Университеты проектлары белән танышырга, робототехника үзәген карап чыгарга, шулай ук уку йортының студентлары һәм профессор-мөгаллимнәр составы белән очрашырга ниятли. 

Аннары Максим Акимов һәм Рөстәм Миңнеханов катнашында Иннополис Университетын һәм тулаем фән шәһәрен үстерү мәсьәләләре буенча киңәшмә узачак. 

Шуннан соң РФ вице-премьеры һәм Татарстан Президенты 2018 елдагы эш йомгаклары буенча Татарстан Мәгълүматлаштыру һәм элемтә министрлыгы коллегиясе утырышында катнашачаклар.

Бүген тагын Максим Акимов Казан вертолетлар заводына да барырга җыена.