Рөстәм Миңнеханов SLUSH бөтендөнья стартаплар конференциясе генераль директоры Андреас Саари белән очрашты

Бүген Хельсинкида LUSH бөтендөнья стартаплар һәм яшь эшкуарлар конференциясе узды. Тананалы ачу чарасында Татарстан Республикасы Президенты Рөстәм Миңнеханов катнашты. 

SLUSH  Европада яңа технологияләр эшләүчеләр өчен әһәмиятле вакыйга дип санала. Быел конференциядә 20 меңнән артык кеше катнашуы көтелә, шул исәптән 2500 стартап вәкиле, меңнән артык венчур инвесторы. 

Конференциядә Рөстәм Миңнеханов SLUSH генераль директоры Андреас Саари белән очрашты. Саари әфәнде әлеге проект тарихы турында сөйләде. Беренче кат конференция Хельсинкида 2008 елда Финляндия компаниләре һәм инвесторлары өчен узыдырылган. Алга таба чара дөнья дәрәҗәсендә үткәрелә башлый, 2017 елда конференциядә 130 ил вәкиле катнашкан. Хәзерге вакытта  SLUSH Хельсинкида гына түгел, ә Токио, Сингапур һәм Шанхайда да уздырыла. 

Рөстәм Миңнеханов билгеләгәнчә, Татарстан технологик эшкуарлык үсешенә, стартапларга ярдәм программаларын булдыру проектларына игътибар итә. ТР Инвестицион-венчур фонды бар, ул Татарстанның инновацион мөмкинлекләрен үстерү белән шөгыльләнә һәм фән ачышларын гамәлгә кертүче кече һәм урта бизнеска ярдәм итә. 

ТР Премьер-министры урынбасары - мәгълхматлаштыру һәм элемтә министры Роман Шәйхетдинов хәбәр иткәнчә, Татарстанда  SLUSH белән берлектә чаралар уздыру мөмкинлеге бар. Шул исәптән Казан венчур ярминкәсе аша да хезмәттәшлек итеп була.