Татарстан Президенты Томскта «Микран» инновацион предприятие эшчәнлеге белән танышты

Бүген Татарстан Республикасы Президенты Рөстәм Миңнеханов Томскта радиоэлектрон технологияләр өлкәсендә тикшеренүләр алып баручы «Микран» фәнни-җитештерү фирмасы эшчәнлеге белән танышты.

ТР Президентын Томск өлкәсе губернаторы Сергей Жвачкин, ТР вице-премьеры - сәнәгать һәм сәүдә министры Альберт Кәримов һәм "Микран" АҖ генераль директоры Вера Парамонова озата йөрделәр.

Предприятие 1991 елда ачылган, телекоммуникацияләр, радиолокация, СВЧ-электроника, робот техникасы, мехатроника һәм башка өлкәләрдә эшчәнлек алып бара. Компания фотоника, көч электроникасы, әйберләр интернеты өлкәсендә актив.

Татарстан Президенты предприятиедә җитештерелә торган продукция үрнәкләре белән танышты. Рөстәм Миңнехановка предприятиенең тарихы, җитештерү өлкәсендә тупланган тәҗрибә һәм инновацион үсеш перспективалары хакында сөйләделәр.

Шулай ук Татарстан Президенты җыю-монтаж цехлары һәм сынау үзәге эше белән танышты.