Рөстәм Миңнеханов Арча муниципаль районы басуларында бәрәңге алуның барышы белән танышты

Бүген Татарстан Республикасы Президенты Рөстәм Миңнеханов Арча муниципаль районы басуларында бәрәңге алуның барышы белән танышты.

Арча муниципаль районына эш сәфәре кысаларында Рөстәм Миңнеханов «Балыкчылар авылы» кунакханә-савыктыру комплексын карады, аннары «Кырлай» агрофирмасы» ҖЧҖ  басуында Арча муниципаль районының җирлекләре башлыклары һәм авыл хуҗалыгы предприятиеләре җитәкчеләре белән очрашты.

Рөстәм Миңнехановны Татарстан Республикасы Премьер-министры урынбасары-Татарстан Республикасы авыл хуҗалыгы һәм азык-төлек министры Марат Әхмәтов озата йөрде.   

Татарстан Президентына бәрәңге алу турында сөйләделәр. «Кырлай» агрофирмасы мисалында районда игелүче берничә сезонлы яшелчәнең – чөгендернең, бәрәңгенең, кәбестәнең кайбер сортларын күрсәттеләр.

Рөстәм Миңнеханов Арча районында үстерелгән ике сорт пешкән бәрәңгедән авыз итте.

Аерым алганда, «Кырлай» АФ ҖЧҖнең 9 711 га чәчүлек мәйданы бар. Шулардан бәрәңге 1 мең га. 15 сентябрьгә агрофирмада бәрәңге 400 га мәйданда җыеп алынган, 14,4 мең тонна казылган, уңыш – бер гектардан 360 центнер (ц/га).