Рөстәм Миңнеханов Кыргызстанда III Бөтендөнья күчмә халыклары уеннарын ачу тантанасында катнашачак

Бүген Татарстан Республикасы Президенты Рөстәм Миңнеханов Кыргызстан Республикасына килде. «Иссык-Күл» халыкара аэропортында Татарстан Президентын Кыргызстан вице-премьеры-министры Жәниш Разаков каршы алды. 

Рөстәм Миңнеханов эш сәфәре кысаларында III Бөтендөнья күчмә халыклары уеннарын ачу тантанасында катнашачак. 

Моннан тыш, Татарстан Республикасы Президенты Рөстәм Миңнехановның Кыргызстан Республикасы Президенты Сооронбай Жәенбәков белән рәсми очрашуы да көтелә. 

Кыргызстанда Рөстәм Миңнехановны Татарстан Республикасы Премьер-министры урынбасары Васил Шәйхеразыев, Татарстан Республикасы спорт министрының беренче урынбасары Хәлил Шәйхетдинов һәм башкалар озата йөри.