Рөстәм Миңнеханов Казахстан Президенты Нурсолтан Назарбаев белән очрашты

Бүген Татарстан Республикасы Президенты Рөстәм Миңнеханов С Президентом Республики Казахстан Республикасы Президенты Нурсолтан Назарбаев белән очрашты. Очрашу Казан Кремлендә узды. Татарстан Республикасы ягыннан ТР Президенты Аппараты Җитәкчесе Әсгать Сәфәров, Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов, Татарстан вице-премьеры Ләйлә Фазлыева, Татарстан Республикасы Президентының халыкара мәсьәләләр буенча киңәшчесе Радик Гыйматдинов, Казахстан Республикасында Татарстан Республикасы Тулы вәкаләтле вәкиле Денис Вәлиев катнашты.

Очрашу алдыннан Нурсолтан Назарбаев һәм Рөстәм Миңнеханов Зеленодольск суднолар төзелеш заводы, «КАМАЗ» ГАҖ, «Форд Соллерс» заводы, Казан вертолетлар заводы продукциясе белән таныштылар.  

Шулай ук Нурсолтан Назарбаев газ-мотор техникасы, аерым алганда, авыл хуҗалыгында кулланылучы газ-мотор техникасы үрнәкләрен карап чыкты. 

Рөстәм Миңнеханов, очрашуны ачып, Нурсолтан Назарбаевка Казанга килүе һәм Татарстан белән хезмәттәшлеккә игътибар биргәне өчен рәхмәт белдерде. Ул шулай ук Казахстан Республикасы Президентының Евразия киңлекләрен үстерүдәге аерым ролен билгеләп үтте. «Бүген Казахстан – безнең төп партнер. Татарстан һәм Казахстан теле һәм дине буенча охшаш. Сезнең ил территориясендә зур татар диаспорасы яши. Без Казахстанның төрле төбәкләрендә булабыз, һәркайда безгә ярдәм күрсәтәләр», - диде Татарстан Президенты.

Рөстәм Миңнеханов белдергәнчә: «Машина төзелеше комплексында, углеводород чималын эшкәртү өлкәсендә хезмәттәшлек перспективалары зур. Сез нефть чыгаруда алдынгы технологияләр куллану буенча эре нефть иле. Безнең дә бу өлкәдә зур тәҗрибә тупланган», - диде ТР Президенты.

Рөстәм Миңнеханов фикеренчә, мәгариф өлкәсендә дә хезмәттәшлек потенциалы зур. «Бүген республикада Казахстаннан 1200 студент белем ала, шулардан 500е – Казан федераль университетында. Астанада мин югары уку йортларыннан иң яхшыларның берсе – Назарбаев Университетында булдым. Без студентлар алмашу өлкәсендә эшне активлаштырырга телибез», - диде Рөстәм Миңнеханов.

Татарстан Президенты Нурсолтан Назарбаевны Астанада «ЭКСПО-2017» халыкара махсуслаштырылган күргәзмәсен уңышлы уздыру белән котлады.   

Үз чиратында Нурсолтан Назарбаев билгеләп үткәнчә, Казахстан белән  Татарстанны якын мөнәсәбәтләр бәйли.  

Казахстан Президенты сәүдә-икътисадый мөнәсәбәтләрне үстерүдә зур  потенциал күрә. Бүген Казахстан белән Татарстан арасында товар әйләнеше $700 млн. тәшкил итә. Нурсолтан Назарбаев, бу сан $1 миллиардка җитәр, дип өмет белдерде.  

Очрашу азагында Нурсолтан Назарбаев Рөстәм Миңнехановка Казахстанның чит илләр гражданнары өчен иң югары дәүләт бүләген – I дәрәҗә «Достык» (Дуслык) орденын тапшырды.