Бүген ТР Дәүләт Советы Рәисе Фәрит Мөхәммәтшин Мәскәүдә РФ Федерация Советында “Товарлар, эшләр һәм хезмәт күрсәтүләрне сатып алу өлкәсендә федераль контракт системасы турында” федераль закон проекты хакында фикер алышуга багышланган киңәшмәдә катнашты. Киңәшмәне РФ Федерация Советы Рәисе Валентина Матвиенко үткәрде.

Әлеге көнүзәк мәсьәлә буенча фикер алышуда РФ Икътисади үсеш министры Эльвира Нәбиуллина, РФ Сәламәтлек саклау һәм социаль үсеш министры Татьяна Голикова, РФ Финанс министры Антон Силуанов, сенаторлар, РФ Дәүләт Думасы депутатлары, федераль башкарма хакимият органнары җитәкчеләре, РФ Президенты хакимияте һәм РФ Хөкүмәте Аппаратлары, җәмәгать оешмалары вәкилләре, экспертлар катнашты.

Валентина Матвиенко, очрашуны башлап җибәреп, дәүләт һәм муниципаль сатып алулар өлкәсен законнар ярдәмендә җайга салу проблемасының һәм 2005 елда кабул ителгән “Дәүләт һәм муниципаль ихтыяҗ өчен товарлар белән тәэмин итү, эшләр башкару һәм хезмәтләр күрсәтүгә заказлар урнаштыру турында” Федераль законны тормышка ашыруның негатив практикасының киң яңгыраш алуын билгеләп үтте. Бу өлкәдә иҗтимагый мөнәсәбәтләрне җайга салучы яңа законны эшләү һәм аны гамәлгә кертү хакындагы карарны РФ Президенты Дмитрий Медведев кабул иткән иде.

Хәзерге вакытта яңа закон проекты эшләнеп, РФ төбәкләренә фикер алышу өчен җибәрелгән иде. Федерация Советындагы бүгенге очрашу әлеге документның уңышлы һәм килеп җитмәгән яклары турында фикер алышуга багышланган иде.

Валентина Матвиенко белдергәнчә, яңа законның максаты – бюджет чыгымнарының нәтиҗәлелеген арттыру. Закон проектындагы яңалыклар өч төркемгә бүленә. Беренчесе – сатып алуларның нәтиҗәлелеген арттыру, сыйфатын яхшырту. Икенче төркемгә коррупциягә каршы чаралар (иҗтимагый контроль кертергә, процедураны башкару кагыйдәләрен катгыйлату һәм вазыйфаи затларның җаваплылыгын арттыру тәкъдим ителә) керә. Өченчесе гамәлдәге законның кимчелекләрен бетерүгә юнәлтелгән. Аерым алганда, сатып алулар үткәрүнең яңа алымнары кертелә, фән һәм мәдәният өлкәсендә, техник яктан катлаулы продукция сатып алулар үткәрү җентекләп карала.

Фәрит Мөхәммәтшин законның үтәлешенә җәмәгатьчелек түгел, махсус орган күзәтчелек итәргә тиешлеген билгеләп үтте. “Киресенчә булганда, урыннарда судлардан башыбыз чыкмаячак”, - диде ул. Аның фикеренчә, электрон мәйданчык операторының эшенә риза булмыйча шикаять бирү механизмын алдан карарга ук карарга кирәк. Фәрит Мөхәммәтшин мондый төр шикаятьләрне карауны федераль дәрәҗәдәге күзәтчелек органына йөкләү максатлы ярашлы булачак дип саный.

Эльвира Набиуллина аңлатып үткәнчә, җәмәгатьчелек күзәтчелеге дә үзенең ролен уйнаячак, ә профессиональ яктан күзәтчелек РФ Хисап палатасында булачак.

Әлеге закон проекты буенча Россия субъектларына һәм муниципалитетларга үз законнарын һәм норматив актларын тормышка ашырганда төбәкләрдәге һәм муниципаль берәмлекләрдәге үзенчәлекләрне исәпкә алырга мөмкинлек бирүче вәкаләтләр бирелгән.