Россия Президентына Казанда Ту-160М тавыш тизлегеннән югарырак тизлек белән оча торган бомбалаучы самолет күрсәттеләр

Бүген Казанга эш сәфәре кысаларында Россия Федерациясе Президенты Владимир Путин белән Татарстан Республикасы Президенты Рөстәм Миңнеханов С.П.Горбунов исемендәге Казан авиация заводында булдылар.

Дәүләт җитәкчесен РФ Премьер-министры урынбасары Дмитрий Рогозин, Россия оборона министры Сергей Шойгу, РФ сәнәгать һәм сәүдә министры Денис Мантуров һәм РФ оборона министры урынбасары Юрий Борисов озата йөрделәр. 

Аэродром комплексында РФ Президенты Ту-160М тавыш тизлегеннән югарырак тизлек белән оча торган бомбалаучы - ракета йөртүче стратегик самолетның очканын күзәтте. Самолетка Россия Хәрби-Һава көчләренең беренче баш командующие, Россия Герое, армия генералы Петр Денейкин исеме бирелде. 

Самолет 300 метр югарылыкта җиде минут тирәсе очты. Очучылар самолетның һавада тотрыклылыгын тикшерә торган маневрлар ясап карады.