Татарстан Премьер-министры: Социаль партнерлык буенча килешүләр төзүдә уңай динамика күзәтелә

Татарстанда социаль-партнерлык буенча төзелгән 203 килешү эшли, шуларның икесе республиканыкы, 25 - тармак, 45 - территориаль, һәм 131 территориаль тармак килешүе. Бу хакта бүген Казанда Республика социаль-хезмәт мөнәсәбәтләрен көйләү буенча өч яклы комиссия утырышында билгеле булды. Тантаналы утырыш бу комиссия оештырылуга 25 ел тулуга багышланган иде.

“Бу комиссия - социаль-партнерлык системасының әйдәп баручы оештыручы звеносы, иң кискен социаль-хезмәт мөнәсәбәтләре мәсьәләләре буенча уйланылган карарлар кабул итү мәйданчыгы”, - диде үзенең сәламләү сүзендә ТР Премьер-министры Алексей Песошин.

Ул шулай ук социаль-партнерлык системасын оештыруда, үстерүдә һәм ныгытуда катнашучыларга рәхмәт белдерде.

Алексей Песошин ассызыклаганча, комиссиянең эшчәнлеге ярдәмендә республикада территориаль, территориаль-тармак һәм тармак килешүләре гамәлгә ашырыла. Алар тарафыннан оешмалар хезмәткәрләре өчен өстәмә социаль гарантияләр һәм ташламалар билгеләнә.

“Соңгы ике елда социаль партнерлыкның барлык дәрәҗәләрендә килешүләр төзү буенча уңай динамика күзәтелә”, - диде ул.

“Барлык якларның үзара хезмәттәшлеге, даими очрашулар, актуаль проблемаларны хәл иткәндә консультацияләр уздыру белән республикада социаль өлкәне үстерүдә сизелерлек уңышларга, җәмгыятьтә социаль тотрыклылыкка ирешелә”, - дип йомгаклады Хөкүмәт башлыгы.

Республика профсоюзлары белән актив хезмәттәшлеге өчен Алексей Песошинга ТР Профсоюзлар федерациясенең “Социаль партнерлык өчен” дигән күкрәк билгесе тапшырылды.