Халык

2010 елдагы Бөтенроссия халык санын алу уздырганда Татарстанда республикада даими яшәүче 3786,4 мең кеше исәпкә алынган. Татарстан Республикасы Россиядә халык саны буенча Мәскәү һәм Санкт-Петербург шәһәрләреннән, Краснодар краеннан, Башкортостан Республикасыннан, Мәскәү, Свердовск һәм Ростов өлкәләреннән кала сигезенче урында тора. Идел буе федераль округында республикабыз – халык саны буенча икенче урында.

2002 елгы халык саны алу белән чагыштырганда, Татарстан Республикасы халкы 7,1 мең кешегә (0,2%) артты. Татарстанда 2012 елда шәһәр халкы өлеше 75,7% булды. Республика башкаласы Казан шәһәре анда яшәүчеләр саны буенча иң алдынгы урында.

Татарстан Россиянең иң күп милләтле территорияләренең берсе. 2010 елгы Бөтенроссия халык санын алу мәгълүматлары буенча Татарстан Республикасы территориясендә 173 милләт вәкиле яши, шуларның сигезе: татарлар, руслар, чувашлар, удмурдлар, мордвалар, марилар, украиннар һәм башкортлар 10 мең кешедән күбрәк санлы. Татарстанда яшәүче халыклар арасында иң күп санлысы – татарлар (2 млн. кешедән күбрәк яисә республика халкының гомуми саныннан 53,2%). Икенче урында руслар – 1,5 млн. артык кеше яисә 39,7%, өченче урында – чувашлар (116,2 мең кеше яисә 3,1%).